Ğazzädä 90 meñnän artıq keşe hälaq buldı, yuqqa çıqtı yäisä yaralandı

Ğazzä xalqınıñ 4%ı ülde, yuqqa çıqtı yäisä yaralandı.

Awrupa –Urta diñgez keşe xoquqların küzätü oyışması “Euro-Med”tan yasalğan belderügä qarağanda, Ğazzä sızığında 90 meñnän artıq keşe suğışta hälaq buldı, yuqqa çıqtı yäisä yaralandı. Bu anda yäşäwçelärneñ yaqınça 4%ı.

İzrailneñ 7nçe oktyabr’dän birle tuqtawsız baruçı hawadan, cirdän häm diñgezdän höcümnäre Ğazzä sızığındağı qorılmalar häm asqormanıñ 70%ı tiräsen yuq itte.

“Euro-Med” mäğ’lümatlarına qarağanda, İzrail höcümnärendä 4nçe ğıynvarğa qadär 30 meñ 676 fälästinle üterelde. Alarnıñ 28 meñ 201 tınıç xalıq.  

Ülüçelärneñ 12 meñ 40ı bala, 6 meñ 103e xatın-qız, 241e mediśina xezmätkäre häm 105e jurnalist.

Fälästin sälamätlek saqlaw ministrlığı statistikalarına östämä bularaq “Euro-Med” kürsätkeçläre İzrail höcümnärendä cimereklär astında qalğan yäisä 14 könnän artıq xäbäre bulmağan häm şuña kürä isän qalu ömete bulmağan keşelärne dä üz êçenä ala.

Yaqınça 1 million 900 meñ fälästinle ışanıçlı sıyınu urını yuqlığı säbäple yäşägän cirennän kitte, regionda 67 meñ 946 toraq tulısınça cimerelde häm 179 meñ 750se öleşçä zarar kürde.

İzrail Ğazzä xalqın cirlärennän kitärgä mäcbür itü öçen gumanitar yärdämneñ töbäkkä kerüen torğan sayın tağın da qısrıqlıy, şulay itep açlıqnı qoral bularaq qullana.

“Euro-Med” yazğança, İzrail mömkin bulğança kübräk ülem, matdi yuğaltu häm cimerelülärgä kiterü öçen belä torıp asqormanı utqa tota.