İzrail İran komandirın üterde

İran inqıylab gvardiyäse armiyäseneñ Süriyädäge komandirlarınnan berse Razi Musävi İzrailneñ Dimäşq’ tiräsenä yasalğan raketa utında hälaq buldı.

İzrailneñ höcümenä İrannıñ reakśiyäse kisken buldı. “Bu cinayät’ öçen, hiçşiksez, cawap biräçäklär”,-dide ilbaşı İbrahim Räisi.

İran tışqı êşlär ministrı Xösäyen Ämir Abdullaxiyan isä sośial’ mediada “Tel’-Aviv kire sanıy başlasın” - dip yazdı.

İnqıylab gvardiyäse armiyäsennän yasalğan belderüdä dä İzrailneñ ğamäle cawapsız qalmayaçağı äytelä.  

Razi Musävi - 2020nçe yılda Ğıyraqta AQŞ höcümendä üterelgän iranlı general Qasıym Söläymaninıñ yaqın duslarınnan berse. Ul Süriyädä armiyäneñ “ölkän xärbi kiñäşçese” wazıygasın başqara.