Kuba Däwlät başlığı İranda

“ISNA” İranlı uquçı yäş’lär xäbär agentlığına kürä, Räisi ike könlek säfär qısalarında başqala Tähranda bulğan Kuba Däwlät başlığı Migel’ Mario Dias-Kanel’ne Saadat Abad sarayında räsmi tantana belän qarşı aldı.

Wäkilleklärara häm ike yaqlı söyläşülärdän soñ ike ilbaşınıñ qatnaşında belem, texnologiya, sälamätlek saqlaw, awıl xucalığı, ênergetika, taw sänäğäte häm êlemtä ölkälärendä kileşü memorandumnarı imzalandı.

Urtaq matbuğat oçraşuında çığış yasawçı Räisi 1979nçı yıldağı İran inqıylabınnan soñ Kuba belän mönäsäbätlärneñ üseş barışına kerüen belderde.

Räisi: "AQŞ sankśiyälärne qullanu yulı belän illärebezne tuqtatırğa planlaştıra ide. Bu alarnıñ yalğış töşençäse ide. İke il mömkinlekläreneñ xezmättäşlek qısalarında qullanıluı häm üsterelüe çikläwlärne täêsirsez xälgä kiteräçäk”, - dide.

Söyläşü waqıtında İzrailneñ Ğazzägä höcümnärenä dä tuqtalıp uzuların belderüçe Räisi: "İke il Fälästin xalqı belän bergä bulu täwäkkällegen kürsätüdä qatğıy. İzrailneñ Ğazzägä höcümnärendä dönya xalıqara cämäğätçelekneñ ni qadär täêsirsez buluına şahit buldı. Xalıqara cämäğätçelek suğış maşinası İzrailne tuqtatırğa tiyeş”, - dip äytte.

İranğa Fidel’ Kastrodan 22 yıldan soñ Däwlät başlığı däräcäsendä berençe säfären yasawına işarät itüçe Dias-Kanel’ dä: "Bu säfärebez İrannıñ Yaqın Könçığışta dus, qardäş il buluın kürsätü häm ozaq waqıtlı maqsatlarıbızğa ireşü omtılışıbızğa iğ’tibarnı yünältü öçen yasaldı”, - dip äytte.

İzrailneñ Ğazzä höcümnärenä tuqtalıp uzuçı Dias-Kanel’: "İzrailneñ meñlägän keşene, şul isäptän xatın-qızlarnı häm balalarnı da üterüen gäyeplibez. Tiz arada ut tuqtatılırğa häm bäysez Fälästin däwläteneñ tözelüe öçen şartlar yaraqlaştırılırğa tiyeş”, - dip belderde.

Kuba İlbaşı AQŞnıñ Kubağa qarata qullanğan iq’tisadi çikläwlärgä qarşı ileneñ İran belän xezmättäşlektän xis itkän qanäğätlelegen dä citkerde.