17 kön uzğaç qotqarıldılar

Hindstannıñ Uttarakxand töbägendä yul êşläre waqıtında işelgän tunnel’ astında qalğan häm 17 kön çığa almağan 41 keşeneñ barısı da qotqarıldı.

İlneñ transport häm cir öste yulları ministrı Nitin Gadkari sośial’ media aşa yasağan belderüendä qotqaru êşçänlegeneñ soñğı yıllardağı iñ ähämiyätle operaśiyälärdän berse buluın häm bik yaxşı koordinaśiyälänüen citkerde.  

Hindstan xökümäte räise Narendra Modi isä qotqaru êşçänlegendä qatnaşqan härkemgä räxmät äytte häm isän-imin başqarılıp çığuına qanäğat’ qaluın belderde.

İsegezgä töşeräbez, Hindstanda 12nçe noyabr’dä äle tözelep betmägän tunnel’ öleşçä işelde. Anda qalğan 41 êşçegä torba aşa kislorod häm rizıq cibärep tordılar. Qotqaru êşçänlege 7nçe köndä borawlaw maşinasınıñ watıluı näticäsendä tuqtalıp qaldı. Cimereklär astında qalğan êşçelär belän 21nçe noyabr’dä genä êlemtä urnaştırıldı.