“Xamas” belän İzrail arasındağı äsir almaşuğa az qaldı

Qatar xökümäte räise häm tışqı êşlär ministrı şäyex Möxämmät bin Abdurraxman Al Sani “Xamas” belän İzrail arasındağı äsir almaşuğa bäyle söyläşülärdä çişeläçäk logistik qıyınlıqlar qaluın belderde.

Al Sani Awrupa Berlege tışqı mönäsäbätlär häm iminlek säyäsäte yuğarı wäkile Jozef Borrell belän başqala Doxada matbuğat oçraşuı ütkärde.

Ul Borrell belän Ğazzädä utnı tuqtatu mäs’äläsen qarawların, monnan tış andağı genośid, açlıq xäle tudıru häm mäcbüri cirlärennän küçerü şikelle küreneşlär turında söyläşülären äytte.

Al Sani suğışnıñ tuqtawı, yärdämnärne kertü öçen gumanitar koridorlarnıñ açıluı ähämiyäten assızıqlap bolay di: “Östenlekle mäs’älälärebez - kiçekmästän utnı tuqtatu, Ğazzägä qarata barlıq üç alunı häm ayırıp tormastan höcüm itüne, genośid, açlıq häm yäşägän cirlärennän mäcbüri küçerülärneñ beterelüe häm ozaq yıllar buyı däwam itkän Ğazzäne qamawnıñ tögällänüe”.

Qatar xökümät räise “Xamas”  belän İzrail arasındağı äsir almaşunıñ tizdän bulaçağın häm keçkenä problemalar ğına qaluın citkerde. Ul Ğazzädäge blokadanıñ beterelüe häm biredä totıluçı izraille totıqlar mäs’äläsen dä qarawların belderde. Al Sani xalıqara cämäğat’çelekne İzrailneñ ğazzälelärne küpläp üterüenä qarşı çığarğa häm nıqlı poziśiyä kürsätergä çaqırdı.