İzrailneñ Ğazzägä höcümnäre tuqtamıy

İzrailneñ Ğazzägä höcümnäre däwam itä.

İzrail Ğazzäneñ üzäk öleşendäge Äl-Mägazi qaçaqlar lagerına höcüm itte.

Fälästin räsmi mäğ’lümat agentlığı “WAFA” xäbärenä qarağanda, höcümdä kübese xatın-qızlar häm balalar bulu belän bergä barlığı 51 keşeneñ ğomere özelgän, küp sanda keşe yaralanğan. 

İzrail armiyäse şulay uq İndoneziya xastaxanäse tiräsendä kim digändä 15 hawa höcüme yasağan. Tel Äz-Zater töbägendä su saqlağıçlar bombalanu säbäple tirä yaqtağı yortlarnı su basqan.

İzrail armiyäse Ğazzädä tağın ber mäçetne bombağa totqan. “Şäyex Zayid Al Nahyan” mäçeten bombalaw belän İzrailneñ Ğazzägä höcümnärendä 55 mäçet tulısınça cimerelgän, 112 mäçet törleçä zıyan kürgän.

İskärtep uzabız: “Xamas”nıñ qorallı törkeme “İz-ad-Din äl-Qassam” brigadaları 7nçe oktyabr’ irtäsendä İzrailneñ fälästinlelärgä häm “Äl-Aq’sa” mäçetennän başlap izge qıymmätlärenä qarata daimi xoquq bozularına qarşılıq kürsätü öçen külämle höcüm başladı.

İzrail armiyäse dä Ğazzäne hawadan bombalarğa kereşte.

İzrail wäqalätleläre Ğazzädän yasalğan höcümnärdä 1400 keşeneñ ülüen, alarnıñ 345eneñ xärbi buluın belderde. 5 meñ 132 izraille isä yaralanğan.

 “Xamas” qulında 240 izraille äsir buluı belderelä.

Ğazzädäge Fälästin sälamätlek saqlaw ministrlığı İzrail höcümnärendä 3 meñ 900 bala, 2 meñ 509 xatın-qıznı kertep, barlığı 9 meñ 500 fälästinleneñ üterelüen, kim digändä 24 meñ keşeneñ cäräxätlänüen citkerä.