Pentagon utnı tuqtatu yaqlı tügel

Amerika Quşma Ştatlarınıñ saqlanu ministrlığı (Pentagon) İzrail belän “Xamas” arasında utnı tuqtatunı yaqlamawların belderde. Alar fikerençä, bu “Xamas”nıñ qabat köç cıyuına mömkinlek biräçäk.

Pentagon süzçese general Pêt Rayder matbuğat cıyılışında jurnalistlarnıñ sorawlarına cawap birde. Anda ul: “Xamas”qa qabat köç cıyu öçen waqıt biräçäk häm İzrail watandaşları belän başqalarğa yanaw tudıraçaq “utnı tuqtatu”nı yaqlamıybız”,-dide.

Rayder AQŞ ilbaşı Djo Baydennıñ Ğazzägä gumanitar yärdäm kertü, äsirlär häm başqa watandaşlarnıñ annan çığuın täêmin itü öçen gumanitar utnı tuqtatuğa unay qarawın äytä. Ul saqlanu ministrı Lloyd Ostinnıñ wazıyfadaşları belän söyläşülärdä cirlektäge grajdanlılarğa yärdämnärne ireşterü mäs’äläsenä tuqtaluların belderä.

Aq Yort milli qurqınıçsızlıq kiñäşçese Djeyk Sallivan da: “Bäreleşne tuqtatup toru “Xamas”nıñ faydasına bulaçaq. Bu çınbarlıq. Biredä butalçıq bulğan berniçä çınbarlıq bar. Gumanitar utnı tuqtatu äsir alınuçılarnıñ irekkä cibärelüe öçen yaxşı bulır ide. Tik “Xamas”nıñ monı üz faydasına qullanaçağına şik yuq”,-dide.