Könçığış Qodüs-Yerusalimnıñ İske şähärendäge ayanıç xällär
İske şähärdä yäşäwçe fälästinlelär êşkä yörü, äyber satıp alu yäisä xastaxanägä baru öçen öydän çığarğa qurqa
İzrail iminlek köçläre soñğı 2 atnada Könçığış Qodüstä kimendä 5 fälästinlene üterde häm yözdän artığın alıp kitte. Bigräk tä çiktän tış uñçı törkemnär xalıqnı fälästinlelärgä qarşı köç qullanırğa öndi. Basıp alınğan Könçığış Qodüs-Yerusalimnıñ İske şähärendä köçle iminlek çaraları ğamäldä.
Biredä yäşäwçe 65 yäş'lek Om Möxämmät küptän tügel yörägenä operaśiya yasatqan häm tabibqa kürenep qaytışı. Xatını belän bergä İske şähärdäge 7 qapqanıñ berse bulğan Dimäşq qapqasınıñ tışındağı basqıçlarğa utırdı, tik İzrail poliśiyase annan kitülären taläp itte.
Om Möxämmät Al-Salaymäx - İske şähärdä yäşäwçe:
- Soñğı waqıtlarda İske şähär çikläre êçendä, xatın-qızlar, yäş'lär häm studentlarnı da kertep, härkem bik yış poliśiya tupaslığına duçar buldı. İzraille kilep urnaşuçılar häm poliśiya bäylänüläre arqasında balalarnı uramğa çığaru qurqınıç.
Om Möxämmät äytkän yäş'lärneñ berse 19 yäş'lek Adnan Şalodi. Fabrikada êşläwçe häm İske şähärdä yäşäwçe Şalodi suğış başlanğannan birle êşkä barmawın äytä.
Adnan Şalodi - İske şähärdä yäşäwçe:
- Xäl ayanıç. Dimäşq qapqası yanında barı ber kilo pomidor satıp alırğa teläsägez dä poliśiya sezne tenti, şäxes tanıqlığın ala häm mısqıllıy. Ber qarşı süz äytsägez, qıynıylar. Açıq hawa törmäsendä yäşibez häm xälebez bik awır. Yäş'lär basım astındağı ölkännärneñ tormışınnan täsribä ala. Şuña kürä irtä olığayırğa mäcbür bulabız.
Kibetlär bikle, mäktäplär yabıldı häm uramnar bup-buş. Biredä tanılğan säwdägär sanaluçı Xajj Vadix Al-Xalavani çikläwek häm cimeşlär sata. Ul şähärneñ öräk-qalağa äwerelüen häm monıñ bolay da naçar xäldä bulğan iq'tisadqa awır täêsir yasawın söyli.
Xajj Vadix Al-Xalavani - säwdägär:
- Êş yuq häm iq'tisad naçar xäldä. Kibetlärebezne barı cillätü öçen açabız, tovarlar bozılmasın dip. İske şähärdä keşe qalmadı. Härkem öyendä häm uramğa çığarğa qurqa.
İzrail iminlek köçläre urnaştırğan qırıs qurqınıçsızlıq çaraları säbäple fälästinlelär rasında citdi qurqu moxite barlıqqa kilde. İske şähärdä yäşäwçe fälästinlelär êşkä yörü, äyber satıp alu yäisä xastaxanägä baru öçen öydän çığarğa qurqa. Monda yäşäwçelär İzrailneñ Ğazzädäge suğışı däwam itkändä xälneñ üzgärmäyäçägen söyli.
