Ğazzädä fosfor bombası qullanıluın belderälär

Fälästin İzrailneñ Ğazzädä xalıq küp yäşi torğan rayonnarğa yasağan höcümnärdä tıyılğan qoral qullanuın belderä. Bu xaqta Fälästin tışqı êşlär ministrlığınıñ X sośial’ media platforması aşa citkergän xäbärendä äytelä.

“Basıp aluçı İzrail Ğazzäneñ tön’yağında Kerame rayonında fälästinlelärgä qarşı xalıqara qağıydälär belän tıyılğan aq fosfor qullana” diyelä anda.

Jenevadağı Awrupa-Urta diñgez keşe xoquqları oyışması (Euro-Med) räise Rami Abdu da İzrail xärbi köçläreneñ Ğazzä şähäreneñ tön’yaq-könbatışında keşe küp yäşi torğan rayonnarda fosfor qoralı qullanuın citkerä.

N’yu-Yorktağı Keşe xoquqların küzätü oyışması da monnan aldağı xisaplarında İzrailneñ Ğazzägä höcümnärendä fosfor qullanuın beldergän ide.

İzrail isä älege mäs’älä xaqında bernindi belderü yasamadı.

“Xamas” oyışması şimbä könne İzrailgä qarşı “Aqsa tufanı” dip ataluçı külämle höcüm başlawın xäbär itte. Ğazzädän İzrailgä taba meñnärçä raketa atıldı, qorallı törkemnär töbäktäge toraq punktlarğa kerde.

İzrail armiyäse dä xärbi oçqıçlar belän Ğazzädä “Timer qılıçlar” xäräkäte başlawın iğ’lan itte.

Kiyerenkelek arta, ike yaqta da yözlärçä ülüçe bar.