Niderlandta qorallı höcümdä 3 keşe ülde

Niderlandnıñ Rotterdam şähärendä 32 yäş’lek şöbhäleneñ qorallı höcümnärendä 3 keşeneñ ğomere özelde. Kiçä töştän soñ bulğan waqıyğalarda başta ülüçelärneñ ikäw, ber yaralı barlığı citkerelgän ide. Tik awır yaralanğan 14 yäş’lek qız xastaxanädä wafat bula. Anıñ änise dä berençe höcümdä hälaq bulğan.

İkençe höcüm isä Êrasmus universitetınıñ xastaxanäsendä yasala. Anda 43 yäş’lek keşeneñ ğomere özelä.

Rotterdam poliśiya idaräse citäkçese Fred Vesterbeke jurnalistlar belän oçraşuda beldergänçä, ike qorallı höcümne dä 32 yäş’lek şöbhäle yasağan. Berençesen ul üze yäşägän rayonda başqara, ikençesen - annan 1 yarım çaqrım yıraqlıqtağı xastaxanädä. Höcümçe soñğısında molotov kokteyle ırğıtıp yanğın çığara. Anı qoralı belän bergä êläkterälär. Östendä yädrä ütkärmi torğan jilet bula.

Xäzer älege höcümnärneñ säbäben tikşerälär. Şöbhäle 2021nçe yılda xaywannarnı cäberläwe öçen xökemgä tartılğan bulğan.