Liviyädä bäreleşlär

Liviyäneñ başqalası Tripolida ike kön däwam itüçe bäreleşlärdä 27 keşeneñ ğomere özelde, 106sı yaralandı. Bu xaqta däwlätkä qarawçı aşığıç yärdäm üzägennän belderälär.

Bäreleşlär Liviyä ilbaşı şurası idaräsenä bäyle cinayät’ häm terrorçılıqqa qarşı köräş bülege “Rada” belän Milli berdämlek xökümätenä bäyle “444 brigadası” arasında ide. Anıñ säbäbe turında räsmi belderü yasalmadı. Şulay da Liviyä matbuğatında cinayät’ häm terrorçılıqqa qarşı köräş bülege  “Rada”nıñ “444 brigadası” komandirı Mäxmüt Xämzäne qulğa aluınıñ bäreleşkä êtärüe turında xäbärlär çıqtı.

Liviyä milli berdämlek xökümäte 2 kön däwam itkän bäreleşlärdän soñ utnı tuqtatu iğ’lan itelüen citkerde.

“Rada” häm “444 brigadası” ilneñ könbatışında êşçänlek alıp baruçı iñ köçle ike xärbi törkem bularaq bilgele.