Kibetlär satılmağan azıqnı buşlay biräçäk
Brüssel'dä kibetlär qullanıla aluçı azıq-töleklärne çüpkä atu urınına büläk itärgä tiyeş bulaçaq
Bel’giyä başqalası Brüssel’dä zur supermarketlar satılmağan, tik äle qullanıla aluçı azıq-töleklärne çüpkä atu urınına büläk itärgä tiyeş bulaçaq. Älege qararnı cirle xakimiyät israfnı kimetü öçen çığara. Ul 1 meñ kvadrat metrdan zurraq urın biläwçe kibetlärgä qağıla. 2024nçe yıldan alar satılmağan häm soñğı qullanu waqıtı yaqınlaşuçı azıq-töleklärne buşlay birergä mäcbür.
Yaña qarar şähärdäge yaqınça 100 supermarketta ğamäldä bulaçaq.
Brüssel’ töbäge xakimiyäteneñ sośial’ yärdäm ministrı Alen Maron qalada yäşäwçe yaqınça 70 meñ keşeneñ azıq-tölek yärdämenä moxtac ikänen belderä. “Mondıy xäldä här könne aşalırğa mömkin tonnalarça rizıqnı çüpkä atuıbız qabul itelerdäy närsä tügel,”-di ul.
Bel’giyädä soñğı yıllarda inflyaśiyä säbäple “azıq-tölek bankı” dip ataluçı noqtalardan faydalanuçılarnıñ sanı arta. Tik yärdäm oyışmalarına rizıq birüçelärneñ sanı kimüe belderelä.
Brüssel’däge urtaça ber supermarketnıñ här ay yaqınça 1 tonna qullanıla aluçı xäldäge azıq-tölekne buşlay birüe, ämma qayberläreneñ monı soñğa qalıp êşläwe, qayberläreneñ isä zur külämdä azıqnı çüpkä atuı bilgele.