Sudanda suğışuçı yaqlar söyläşep kileşergä äzer

Sudanda aprel’ urtasınnan birle suğışuçı yaqlar Ciddädä uzuçı söyläşülärgä kire qaytırğa mömkin. Ul Amerika Quşma Ştatları häm Soğud Ğaräbstanı aradaşçılığında daimi utnı tuqtatu öçen başlanğan ide häm may ayında tuqtalıp qaldı. Xäzer Sudan armiyäse söyläşülärgä kire qaytırğa teli. Diplomatik çığanaqlardan alınğan mäğ’lümatlarğa qarağanda, ber delegaśiyä monıñ öçen Soğud Ğaräbstanınıñ Ciddä şähärenä yul aldı.

Wäqalätlelär söyläşü prośessınıñ uñışınıñ “Operativ yärdäm köçläre” törkemeneñ citdilegenä häm kileşü şartların ütäwenä bäyle buluın söyli. Älege xärbi oyışma wäkile dä krizisqa tınıç çişeleş tabu öçen söyläşülärne qabat başlarğa äzer buluların belderde.

“Tınıç xalıqnıñ problemaların beterü öçen söyläşülärne däwam itärlek säyäsi ixtıyarıbız bar,”-dide “Operativ yärdäm köçläre” wäkile.

Sudan armiyäse qarşı yaqnıñ utnı tuqtatu kileşüen bozuına reakśiyä bularaq 31nçe mayda söyläşülärdän çıqtı.

Bilgele bulğança, “Operativ yärdäm köçläre”  - xärbi törkem. Sudan armiyäse anıñ 2 yıl êçendä tulısınça üzenä quşıluın taläp itte. “Operativ yärdäm köçläre” isä grajdanlı xökümät kilgännän soñ yaqınça 10 yılğa suzılğan prośessta monı qabul itä aluların belderde. Şunnan soñ başlanğan äytkäläşü 15nçe aprel’ irtäsendä qorallı bäreleşlärgä äwerelde. Älege bäreleşlärdä 3 meñnän artıq keşeneñ ğomere özelde, distälärçä meñe isä yaralandı. Monnan tış 3 millionnan artıq keşe yäşägän cirlären taşlap kitärgä mäcbür buldı.