İllärneñ 94%ı kirägennän artıq aşıy
Tikşerenü näticäläre şunı kürsätkän
Berläşkän Millätlär Oyışmasına äğz’a illärneñ köndälek kaloriya qullanuına nigezlänep äzerlängän isemlektä illärneñ 94%ınıñ kiñäş itelgän külämnän kübräk rizıq qullanuı açıqlandı.
“Daily Mail” xäbärenä qarağanda Oksford universitetınıñ "OurWorldInData" tikşerenüe kürsätkänçä, 184 ilneñ 173endä keşelär könlek täq’dim itelgän 2000-2500 kaloriyädän kübräk qullanğannar.
Bu mäğ’lümatlar illärdäge här ğailä satıp alğan urtaça azıq-tölek küläme aşa isäplängän.
İsemlekneñ berençe bişlegendä 4 meñ 12 kaloriya belän Baxreyn, 3 meñ 868 kaloriya belän Amerika Quşma Ştatları, 3 meñ 850 kaloriya belän İrlandiya, 3 meñ 824 kaloriya belän Bel’giya häm 3 meñ 762 kaloriya belän Türkiyä urın ala. İsemlekneñ axırında isä 1 meñ 641 kaloriya belän Üzäk Afrika Cömhüriyäte tora.
Tikşerenü kürsätkänçä, artıq aşaw - simerüneñ berençe säbäbe häm 1970 nçe yılda dön’ya külämendä 175 million bulğan oçraqlar sanı bügenge köndä 1 milliardqa qadär artqan.
Tikşerenü mäğ’lümatları BMOnıñ Azıq-tölek häm awıl xucalığı oyışmasınnan alınğan.