Franśiyädä protestlar waqıtında 1 keşe ülgän

Franśiyädä Aljir çığışlı yäş’ maşina yörtüçene poliśiyä atıp ütergännän soñ başlanğan protestlarda atna axırında ber qorban terkälde.

Cirle gazet “La Marseillaise”nıñ xäbärenä qarağanda, Marsel’ şähärendä 1nçe iyül’dän 2senä qarşı töndä protestlar waqıtında 27 yäş’lek beräwneñ ğomere özelä. Anıñ kükrägenä plastik yädrä tigän.

Qala prokuraturası bu waqıyğanı tikşerä. Annan yasalğan belderüdä äytelgänçä, älege keşegä plastik yädräneñ qayda tiyüe täğayın genä açıqlanmağan.

Ul tönne cirlektä rizasızlıq çaraları häm talaw oçraqları bulsa da, ülgän keşeneñ anda qatnaşuı da tögäl bilgele tügel.

Şul uq waqıtta, Franśiyä ilbaşı Êmmanuêl’ Makron aljirlı yäşüsmerneñ maşina yörtkändä poliśiyä tarafınnan atıp üterelüenä rizasızlıq bularaq başlanğan çaralar ütüçe şähärlärneñ mêrları belän Yelisey sarayında oçraştı. Ul xällär tağın da möşkellänsä, sośial’ medianı çikläw yäisä özügä äzer bulırğa quştı.

İlneñ êçke êşlär ministrı Jeral’d Darmanin parlamentta yasağan çığışında rizasızlıq çaralarında saq astına alınğan 4 meñ keşeneñ 10%tan kimrägeneñ çit il keşese buluın belderde.

Yustiśiyä ministrı Êrik Dyupon-Moretti isä saq astına totıluçılarnıñ 350seneñ qulğa alınuın citkerde.

Franśiyädäge köçle protestlar

27nçe iyün’dä franśuz poliśiyäse êçendä 3 keşe utırğan maşinağa ut açtı häm 17 yäş’lek yörtüçe Nael M.nı üterde. Moña rizasızlıq belderüçelär il külämendä törle şähärlärdä uramğa çığıp poliśiyä belän bäreleşte.

Yäşüsmerne ütergän poliśiyä xezmätkäre êşennän çitläşterelde häm saq astında xökem itelüenä qarar qılındı.

Parij, Marsel’, Lionnı da kertep bik küp şähärdä uzğan protest çaralarında talaw häm marodyerlıq oçraqları buldı, 10lap qalada säğat’ kiçke 9dan soñ uramğa çığu tıyıldı.