Şveśiyada Qor’änneñ yandırıluına dönyadan reakśiyälär
Şveśiya başqalası Stokgol’mda mäçet aldında Qor’än-ı Kärimneñ yandırıluına röxsät birelüenä qarata xalıqara mäydanda rizasızlıq belderelä
Berläşkän Millätlär Oyışmasınıñ Śivilizaśiyälär İttifaqı (UNAOC) yuğarı wäkile Miguel Angel Moratinos yasağan yazmaça belderüendä Stokgol’mda mäçet aldında Qor’änneñ yandırıluın kisken räweştä gäyıpläde.
Moratinos şuşı cirängeç ğamälneñ Qorban bäyrämen qotlawçı möselmannarğa zur ixtiramsızlıq buluın iskärtep uzdı.
Süz iregeneñ möhim buluın, läkin izge kitaplarğa, urınnarğa häm simvollarğa xörmätsezlek kürsätelüeneñ qabul itelmäslek buluına basım yasawçı Moratinos: "Mondıy ğamällär köç qullanuğa kiterä, qırıslıqqa yul aça,” – dip belderde.
İslam xezmättäşlek oyışması da waqıyğanı tikşerü öçen kiläse atnada Soğud Ğaräbstanınıñ Ciddä qalasında çirattan tış cıyılaçaq.
Cıyılışta Şveśiyada Qorban bäyrämeneñ berençe könendä Qor’än-ı Kärimneñ yandırıluına qağılışlı adımnarnıñ quzğatılaçağı äytelgän belderüdä: "Cıyılış şuşı cirängeç ğamällärgä qarşı küreläçäk çaralar turında söyläşüne häm Qor’ängä ixtiramsızlıqqa qarşı urtaq totışnı bilgeläwne maqsat itä,” – dip citkerelde.
İran da Qor’änneñ yandırıluına röxsät birelüenä reakśiya bularaq Şveśiyanıñ Tährandağı waqıtlı wäkilen Tışqı êşlär ministrlığına çaqırdı.
Şveśiya diplomatına Tährannıñ protestı citkerelde.
Ğıyraq başqalası Bağdatta isä bertörkem protestçı, Qor’änneñ yandırıluına reakśiya kürsätep, Şveśiya ilçelegenä basqın oyıştırdı, “Qor’ängä äye” şiğarlären äytte.
Amerika Quşma Ştatları däwlät departamentı da Qor’änneñ yandırıluın häm gäyıpläde, häm dä bu ğamälgä röxsät birelüen “süz irege” bularaq bäyäläde.
