"Urta diñgezdä kürelgän iñ awır faciğa"

Awrupa Berlege komissiyäseneñ êçke êşlär öçen cawaplı äğ’zası İlva Yoxansson Greśiyä sulıqlarında uzğan atnada bulğan qaçaq köymäse hälakäteneñ Urta diñgezdä kürelgän iñ awır faciğa bula aluın äytte. Ul bu xaqta matbuğatqa belderülär yasadı.

Yoxansson waqıyğanıñ Liviyäneñ könçığışınnan Awrupağa taba artqan migraśiyä ağımınnan kilep çığuın, älege marşrut buyınça Awrupa Berlege, bigräk tä, İtaliyägä kilüçelärneñ yıl başınnan birle 600%qa kübäyüen söyläde. U lülemle hälakättän alda uzdırılğan tikşerenülärdä sudnonıñ Misırdan quzğalıp Liviyäneñ könçığış öleşenä kilüe häm 750 tiräse qaçaq utırtuı kürenüen citkerde.  Tik balıqçı köymäsendäge keşe sanın älegä tögäl genä açıqlıy almıylar. Yoxansson köymäneñ qaldıqlarına qarağanda, bu hälakätneñ Urta diñgezdäge iñ awır faciğa bula alaçağın äytä.

“Bu Urta diñgezdäge mondıy faciğalärne buldırmıy qalu öçen, çınnan da, tağın da kübräkne êşlärgä kiräklegen kürsätte,”-dide Yoxansson.

İsegezgä töşeräbez, 14nçe iyün’dä Greśiyäneñ Peloponnes yarımutrawındağı Navarinnan 47 diñgez mile yıraqlığında xalıqara sularda migrantlarnı utırtqan balıqçı köymäse äylänep qaplandı. Andağı 104 keşene qotqarıp Kalamata portına ilttelär. Waqıyğadan soñ alıp barılğan êşçänlektä 82 keşeneñ üle gäwdäse tabıldı. Tağın yaqınça 500läp keşeneñ yuqqa çığuı uylanıla.