“Qıtay AQŞnı xörmät itä, AQŞnıñ da Qıtayğa ixtiram kürsätüe zarur”
Amerika Quşma Ştatları däwlät särkätibe Êntoni Blinken Qıtayğa yasağan räsmi säfär qısalarında İlbaşı Si Cinpiñ tarafınnan qabul itelde
Si Blinkenneñ säfäre waqıtında Amerika Quşma Ştatları belän Qıtaynıñ bertörkem mäs’älädä alğa kiteşneñ buluın häm kileşügä ireşelüen belderde.
Qıtay tışqı êşlär ministrlığı isä söyläşü belän bäyle belderüendä: "Qıtay tarafı poziśiyasın açıqladı häm här ike taraf Si Cinpiñneñ AQŞ İlbaşı Djo Bayden belän 2022nçe yılda Balida ütkärelgän G20 sammitınıñ utırışları arasında ireşelgän fiker berlegen tormışqa aşırunı qabul itte,” – dip äytelde.
Si Qıtaynıñ AQŞnı xörmät itüen, qarşı toru häm qısrıqlap çığaru omtılışında bulmawın belderep, Amerika Quşma Ştatlarınıñ da Qıtayğa ixtiram kürsätüe häm legitim xoquqlarına häm mänfäğätlärenä zarar birmäwe zarurlığına basım yasadı.
Si Qıtaynıñ AQŞ belän nıq häm totrıqlı mönäsäbätlär urnaştırunı ömet itüen, ike zur ilneñ ike yaqlı xörmät, tınıçlıq êçendä bergä yäşäw häm üzara faydalı xezmättäşlek añlayışı belän aralarındağı törle problemalarnı xäl itä alaçağına ışanuın äytte.
İke könlek räsmi säfär belän kiçä Pekinğa kilgän Blinken Djo Baydennıñ 2021nçe yıl başında wazıyfasına başlağannan soñ Qıtayğa säfär yasawçı AQŞlı iñ yuğarı däräcäle räsmi zat buldı.
Amerika Quşma Ştatları däwlät särkätibe yäkşämbe könne Qıtaylı wazıyfadaşı Çin Gang belän dä küreşep söyläşkän ide.
İke il arasında Tayvan’ problemasınnan Kön’yaq Qıtay diñgezendäge xärbi kiyırenkelekkä, iq’tisadi häm texnlogik köndäşlektän keşe xoquqları mäs’äläsenä qadär küp sanda problemalı ölkä bar.
