Gaitidä 3 million bala humanitar yärdämgä moxtac

Berläşkän Millätlär Oyışmasınıñ YUNİSEF Balalarğa yärdäm fondı tarafınnan yasalğan belderüdä başqala Port-o-Prensta häm tirä-yağında arta barğan "bandalar zolımı”nda balalarnıñ turıdan-turı nişan itep alınuına basım yasaldı.

Belderüdä balalarnıñ mäktäpkä barğan çaqta üterelüenä yäki yaralanuına, xatın-qızlarnıñ häm yäş’ qızlarnıñ da censi cäberlänülärgä duçar buluına iğ’tibar yünältelde.

Uquçılar, uqıtuçılar häm sälamätlek saqlawçılar belän bergä yolım öçen keşe urlaw ğamälläreneñ häm mäktäplärgä höcümnärneñ artuına basım yasalğan belderüdä "bandalar zolımı” arqasında distälärçä meñ keşeneñ küçep kitüe citkerelde.

Belderüdä: "Port-o-Prens üzägendä küp sanda balanıñ häm yäş’lärneñ üzlären saqlaw yäki ğailälärenä aqça häm azıq-tölek täêmin itü öçen qorallı törkemnärgä quşılırğa mäcbür itelüe äytelä,” – dip iskärtelep uzıldı.

YUNİSEFneñ Gaitidäge êşçänlegen çiklängän finans çığanaqlarına qaramastan arttıruı citkerelgän belderüdä bu ilgä bıyıl 246 million dollar täêmin itelergä tiyış ide, läkin bügengä çaqlı monıñ barı tik 15%ınnan tağın da äzräge qanäğätländerelde, dip basım yasaldı.

Belderüdä Gaitidäge bandalarnıñ qırıslığı näticäsendä ildä artqan açlıq häm citärsez tuqlanu arqasında 3 million diyärlek balanıñ humanitar yärdämgä ixtıyacınıñ buluı iskärtelep uzıldı.

Gaitidäge ictimağıy tärtipsezleklär 2021nçe yılnıñ iyül’ ayında İlbaşı Jovenel’ Moiznıñ üterelüe, şul uq yılnıñ avgustında 2 meñ 200dän kübräk keşeneñ ülemenä häm distälärçä meñ öyneñ cimerelüenä säbäp bulğan 7,2 zurlığındağı cirteträw, inflyaśiya, xolera oçraqları, keşe urlaw häm köç qullanunıñ artuı belän soñğı yıllarda möhim däräcädä arttı.

İldä qorallı törkemnärneñ bäreleşläre arqasında 2022nçe yılnıñ aprel’ ayınnan birle yözlägän keşeneñ ğomere özelgän.