Süriyä temalı Astana söyläşüläre başlıy

Qazaqstan tışqı êşlär ministrlığınnan yasalğan belderügä kürä, 20nçese oyıştırılaçaq Süriyä temalı Astana söyläşülärendä garant illär Türkiyä, Rusiyä häm İran wäkillekläre belän bergä Süriyä rejimı belän oppoziśiya wäkilläre dä qatnaşaçaq.

20nçe-21nçe iyün’dä Astanada ütkäreläçäk cıyılışta Berläşkän Millätlär Oyışması belän Yordaniya, Livan häm Ğıyraq küzätüçe statusı belän urın alaçaq.

Taraflar cıyılışta Süriyä tiräsendäge regional’ wazğıyätneñ üzgäreşlären häm cirlektäge soñğı täräqqıyätlärne söyläşäçäk.

Süriyädäge terrorçılıq belän köräş, totıqlarnıñ irekkä cibärelüe, xäbärsez yuğalğan keşelärne êzläw kebek ışanıç arttıruçı çaralar belän ber rättän humanitar wazğıyät, ilneñ yañadan tözekländerelüe häm Süriyäle qaçaqlarnıñ illärenä qaytuı öçen şartlarnıñ tudırıluı kebek mäs’älälär dä cıyılışta quzğatılaçaq.

Berençe könne Türkiyä, Rusiyä häm İran tışqı êşlär ministrı urınbasarları arasında Süriyä-Türkiyä mönäsäbätläreneñ cayğa salınuınä yünältelgän "Yul kartası"na qağılışlı dürt yaqlı kiñäşmälär ütkäreläçäk.

İkençe könne isä wäkilleklär arasında uzdırılaçaq ike yaqlı häm öç yaqlı cıyılışlardan soñ töp utırış belän matbuğat oçraşuı oyıştırılaçaq.

Söyläşülär waqıtında garant illärneñ wäkillekläre belän BMO qaçaqlar yuğarı komissarlığı häm Xalıqara Qızılxaç wäkilläre arasında mäcbüri qulğa alınğannar belän bäyle êş törkeme cıyılışı da uzdırılaçaq.

Süriyä temalı Astana söyläşüläre soñğı tapqır 2022nçe yılnıñ 22nçe-23nçe noyabr’ könnärendä ütkärelgän ide.