Milliardernıñ qızı häm onığı oçqıç hälakätendä ülde

Amerika Quşma Ştatları başqalası Vaşington tiräsendä kiçä oçış tıyılğan cirlekkä kilep töşkän şäxsi oçqıçta ğomere özelüçelär arasında milliarder êşmäkär Djon Rumpel’neñ qızı häm onığı buluı açıqlandı.

Floridada urnaşqan “Melbourne Inc” şirkäteneñ xucası Rumpel’ “N’yu-York Tayms” gazetına interv’yusında oçqıçta qızı, 2 yäş’lek onığı, bala qarawçı häm şirkät oçuçısı buluın äytte. Alarnıñ Tön’yaq Karolinadan N’yu-Yorknıñ Long İsland rayonındağı öylärenä qaytışları bulğan.

Milliarder “Encore Motors” şirkätenä qarawçı oçqıçnıñ hälakäte belän bäyle wäqalätlelärdän ällä-nı mäğ’lümat ala almawın, tik oçqıçnıñ basımı töşüe näticäsendä qaza kilep çığu mömkinlege qaraluın belderde.

Federal’ aviaśiya idaräsennän yasalğan yazmaça belderüdä Tennesidan Long İslandqa baru öçen kütärelgän Gessna törendäge oçqıçnıñ başqala östendä oçu öçen tıyılğan zonağa kerüe, soñınnan Virdjiniyanıñ kön’yaq-könbatışında tawlı cirlekkä töşüe belderelgän ide. Şunnan soñ berniçä säğat’ ütügä poliśiyäneñ hälakät urınına barıp citüe, oçqıçtağılarnıñ berseneñ dä isän qalmawı xäbär itelde.