Netan'yaxunı "cimerdelär"

İzrail xökümäte räise Bin’yamin Netan’yaxunıñ şäxsi internet säxifäsenä häm Feysbuk bitenä kiber höcüm yasaldı.

Cirle matbuğat çaralarında çıqqan xäbärlärgä qarağanda, monı kiçä ilneñ tışqı küzläw oyışması Mossadnıñ internet säxifäsen “cimergän” törkem “Anonim Sudan” başqarğan. Xakerlar höcümenä duçar bulğan Netan’yaxunıñ internet säxifäsenä kerä almawı belderelde.

İzrail êçke küzläw oyışması Şin-Bet älege oçraqnı tikşerä başlağan.  

“Anonim Sudan”nıñ Rusiyä xakerlar törkeme “Killnet” belän yaqınnan bäyläneşle buluı uylanıla.

“The Jerusalem Post” gazetınıñ 4nçe aprel’dä çıqqan xäbärendä İzrailneñ aldınğı universitetlarınıñ internet säxifäläreneñ “Anonim Sudan” dip ataluçı xaker törkeme höcümenä duçar buluı belderelgän ide. İl mediasında 14nçe aprel’dä urın alğan xäbärlärdä isä poçta şirkäte, qayber zur banklar häm êlektr kompaniyälärenä kiber höcüm turında äytelä.

Kiçä dä Mossad häm İzrail milli iminiyätläşterü oyışmasınıñ internet säxifälären xakerlar “cimerde”.

Höcümnär öçen cawaplılıqnı üz östenä alğan “Anonim Sudan” törkeme Telegramda belderü yasadı. “Bu zur ber höcümgä äzerlek” diyelä anda.