Sudanda Amerikanıñ diplomatik konvoyına höcüm
AQŞ däwlät särqatibe Êntoni Blinken älege ğamälne kem qıluın kürsätüçe dälillär tabıluın citkerde
Amerika Quşma Ştatlarınıñ däwlät särqatibe Êntoni Blinken armiyä belän “Operativ yärdäm köçläre” xärbi törkeme arasında bäreleşlär baruçı Sudanda kiçä Amerikanıñ diplomatik konvoyına ut açuların belderde.
BBCdä urın alğan xäbärgä qarağanda, G7 tışqı êşlär ministrları cıyılışı öçen Yaponiyägä kitkän Blinken Sudan başqalası Xartumdağı waqıyğada ülüçe yäisä yaralanuçı bulmawın, tik höcümneñ qabul itelmäs ikänlegen yaqlarğa belderüen citkerde. “Bu ğamäl duamallıq, cawapsızlıq”- dide ul häm höcümdä konvoydağılarnıñ iminlege qurqınıç astına quyıluın äytte.
Blinken waqıyğanı tikşerüneñ däwam itüen, berençel mäğ’lümatlar anda “Operativ yärdäm köçläre” xärbi törkemeneñ qatışı buluın kürsätüen söyli.
AQŞ däwlät departamentı süzçese Djon Kirbi iminlek borçuları däwam itsä häm Xartum aêroportı yabılsa da, xäzerge êtapta Sudandağı Amerika xezmätkärlären êvakuaśiyäläw plannarı bulmawın belderde.
Süz uñayınnan, Awrupa Berlegeneñ Xartumdağı irlandiyäle ilçese Aidan O’Xara üze yäşi torğan yortta höcümgä duçar buldı, tik citdi yaralanmıyça qotıldı.
