Sudanda bäreleşlär däwam itä

Sudanda armiyä häm “Operativ yärdäm köçläre” dip ataluçı xärbi oyışma arasında 15nçe aprel’dä başlanğan bäreleşlärdä 83 keşe ülde, 1126sı yaralandı.

Bötendön’ya sälamätlek saqlaw oyışması bu nisbättän yasağan belderüendä zarar kürüçelärneñ Xartum, Kön’yaq Kurdufan, Tön’yaq Darfur häm tön’yaq töbäklärdä buluın citkerä. İñ köçle bäreleşlärneñ Xartumda buluı äytelä.

Bötendön’ya sälamätlek saqlaw oyışması barlıq yaqlarğa, xalıqara xoquq qısalarında, yaralılar, awırular, grajdanlılar, mediśina xezmätkärläre, aşığıç yärdäm maşinaları häm xastaxanälärne saqlaw burıçların xäterlätte.

Räsmi çığanaqlardan alınğan mäğ’lümatlarğa qarağanda, Sudan şaxta ministrı Möxämmät Bäşirneñ başqala Xartumdağı öyenä 2 raketa töşkän. Anda ministrnıñ ğailäsendäge 2 keşe ülgän, saq xezmätkärlären dä kertep 3 keşe yaralanğan. Bäşir üze waqıyğada zarar kürmi.

Armiyädän belderülärençä, “Operativ yärdäm köçläre” oyışması başqalada armiyä ştabındağı qayber binalarnı nişanğa ala häm töz märgännär belän höcüm yasıy. Xärbilär ğaskärlärneñ qullarınnan kilgänneñ barısın da êşläwlärenä häm wäzğıyät’neñ tizdän çışeläçägenä ışandıra.