Sudanda xätär: köçle bäreleşlär başlandı

Sudanda kiçä armiyä belän “Operativ yärdäm köçläre” dip ataluçı xärbi törkem arasında çıqqan bäreleşlärdä 56 grajdanlı hälaq buldı. Şulay itep xärbi iminlek reforması mäs’äläsendäge añlaşılmawçanlıq qaynar bäreleşkä äwerelde.

Başqala Xartum häm başqa şähärlärdä atqan tawışlar işetelä. Xärbi törkem armiyäneñ aviabazasın häm Darfurdağı Şähit Sabira xalıqara aêrıoportın qulğa töşerüen xäbär itte. Armiyäneñ qayber tanklarınıñ da qorallı törkem kontrolenä küçüe belderelde. Sudan armiyäse wäzğıyät’ne üz qulına alu öçen operaśiya başladı. Annan “Fetnäçelär yuqqa çığarılğançı dialog başlanmayaçaq” dip belderü yasaldı. Operaśiyädä xärbi oçqıçlar da qatnaşa. Alar “Operativ yärdäm köçläre” törkemeneñ saqlağıçların utqa tota.

Sudan tışqı êşlär ministrlığı fetnäçelärneñ Xartum xalıqara aêroportına höcüm itüen belderde. Alar Soğud Ğaräbstanı hawa yullarınıñ oçqıçı belän Sudannıñ ber oçqıçına atqan. Qorallı törkemne aêroport tiräsennän yıraqlaştırğannar.

Sudan tabiblar üzäk komitetı bäreleşlärdä xäzergä qadär 56 keşeneñ ülüen, 595eneñ yaralanuın citkerde. Atışularnı tuqtatu öçen diplomatik êşçänlek bara.

Türkiyä tışqı êşlär ministrlığı belderü yasap, bäreleşlär öçen borçıluın citkerde, yaqlarnı tınıçlıq häm dialogqa çaqırdı. Anda “Türkiyä Sudan däwläte häm xalqı yanında bulaçaq” digän süzlär qullanıldı.

Türkiyäneñ Xartum ilçelegennän dä xäzergä tışqa çıqmasqa häm kiräk bulmağanda säyäxät itmäskä kiñäş itelde.

BMO häm Afrika Berlege yaqlarnı utnı tuqtatırğa çaqırdı.

Misır häm Soğud Ğaräbstanı Sudandağı wäzğıyät’ nisbätennän Ğaräp Berlegenä açığış räweştä cıyılırğa täq’dim itte.

Franśiyä, Angliyä, Şveyśariya häm İrannı da kertep bik küp däwlät bäreleşlär öçen borçıluların belderde.

Soğud Ğaräbstanı Sudanğa oçışlarnı tuqtatıp tora. Çad Sudan belän ike aradağı çiklärne yaptı.