Pentagonnıñ "yäşeren" tamğalı Ukraina dokumenları sośial’ mediada çıqtı
Twitter häm Telegramda taralğan dokumentlarnıñ çın buluı tögäl tügel
Pentagon östendä AQŞ Ğomumştab idaräseneñ gerbı toruçı häm êçendä Ukrainadagı suğış turında mäğ’lümatlar bulğan “yäşeren” tamğalı dokumentlarnıñ sośial’ mediada çığuı nisbätennän tikşerü başlawların belderde. Alar Twitter häm Telegramda taralğan.
Pentagon süzçese urınbasarı Sabrin Singx: “Sośial’ mediadağı urtaqlaşularnı beläbez häm ministrlıq bu mäs’äläne tikşerä” dide. Ul älege dokumentlar häm alarnıñ êçtälegeneñ çın yäki yalğan buluı turında äytmäde.
Dokumentlarda suğışnıñ barışı turında analizlardan tış illär tarafınnan birelgän yärdämnär häm alarnıñ suğış qırına barıp ireşü waqıtlarına qadär bik küp detal’ bar. Şulay uq, Ukraina armiyäseneñ kiläse atnalardağı ixtiyacları belän bäyle mäğ’lümatlarğa da urın birelä
Dokumentlarnıñ zur külämdä çın buluı söylänsä dä, qayber detal’lärneñ üzgärtelgän bula aluı äytelä.
Säxifälärneñ bersendä 16 meñnän 17 meñ 500gä qadär Rusiyä xärbiyeneñ üterelüe, ä Ukraina yuğaltularınıñ kimendä 71 meñ 500 buluı citkerelä.
Tik AQŞ çığanaqlarında bu başqaça. Anda Rusiyäneñ yaqınça 200 meñ üle häm yaralısınıñ buluı, Ukrainanıñ yuğaltularınıñ 100 meñnän artıq ikäne farazlana.
