Talibannıñ qararı "tulısınça qurqaqça"

Berläşkän Millätlär Oyışmasınıñ Keşe xoquqları yuğarı komissarı Volker Türk Äfğanstanda xatın-qızlarnıñ BMO belän êşläwen tıyuların tänqıyt’läde. Ul yazmaça belderüendä älege qararnı “tulısınça qurqaqça” dip atadı.

Volker Türk monıñ äfğan xatın-qız häm qız balalarnıñ xoquq häm ireklären kirtäläw öçen yasalğan adımnarnıñ axırğısı buluın assızıqladı. Ul Äfğanstanda yaqlawçısız qaluçılarğa teräk bulu öçen bergä êşlärgä kiräklegen, mondıy qararlarnıñ il xalqın tağın da kübräk ömetsezlekkä êtäräçägen belderde. “Taliban idaräse Äfğanstan xalqınıñ igelege häm kiläçäge öçen xatın-qızlarğa qarata bu ayanıçlı säyäsätlären qabat qarar çığarğa tiyeş,”-di komissar.

Taliban qız balalarnıñ belem aluın tuqtatu qararınnan soñ 2022nçe yılnıñ 24nçe dekabrendä ictimağıy oyışmalardağı xatın-qız xezmätkärlärneñ êşläwenä dä çik quydı. Monı ütämäwçe oyışmalarnıñ liśenziyäläre alınaçağı belderelde. Şunnan soñ ildäge qayber xalıqara yärdäm oyışmaları üzläreneñ êşçänleklären tuqtattı.

Talibannıñ qararına Awrupa Berlege, BMO, Amerika Quşma Ştatları häm başqa illär reakśiyä belderde.