Rizasızlıq belderü çaralarında ülüçelär sanı 69ğa citkän

 Peruda xökümätkä qarşı rizasızlıq belderü çaralarında ülüçelär sanı 69ğa citkän.

Peru matbuğatı yazğança, demonstraśiyälärdä yaralanğan 37 yäşendäge Manuêl’ Kuillanıñ Djuliaka şähärendä ğomere özelgän, şulay itep 2022 nçe yılnıñ 11 nçe dekabrennän birle uzğan protest çaralarında ülüçelär sanı 69 bulğan.

Kuillanıñ ülemennän soñ belderü yasağan ğailä äğ’ zaları anıñ poliśiya bülekçäsendä cäfalaw-intekterü arqasında ğomeren yuğaltuın alğa sörälär.

İldäge keşe xoquqları oyışmaları äytüençä, rizasızlıq belderü çaralarında ülgän 69 keşeneñ 59ı qurqınıçsızlıq köçläreneñ köç qullanuı arqasında yaqtı dön’yadan kitkän.

Protestçılar ilbaşı Dina Boluartnıñ wazıyfasınnan kitüen, Kongressnı yabunı häm waqıtınnan alda saylawnı tiz arada ütkärüne taläp itälär.

Peruda protestlar êlekke ilbaşı Pedro Kastillo 2022 nçe yılnıñ 7 nçe dekabrendä Kongress tarafınnan wazıyfasınnan alınğannan soñ başlandı.