Taliban Äfganstanda kinder üsterüne tıyğan

Ӓfganstanda Taliban waqıtlıça xökümӓte il külӓmendӓ mӓktän soñ kinder üsterüne dä tıyğan.

Taliban liderı Mulla Xibetulla Axundzadӓ qararı belӓn ildӓ kinder üsterü häm anıñ belӓn sӓwdӓ itü tıyılğan, bu qararnı ütӓmawçelӓr cӓzağa tartılaçaq.

Älege tıyunı küzätü häm ütäw Taliban waqıtlıça xökümäteneñ êçke êşlär ministrlığı häm bäyläneşle oyışmalar cawaplılığında bulaçaq.

Berläşkän Millätlär Oyışması xisaplarına qarağanda ,2010 nçı yılda Äfganstan dön’yada iñ küp kinder citeşterçe il ide.

Uzğan yılnıñ aprel’ ayında Taliban liderı Mulla Xibetulla Axundzadӓ qararı belӓn ildӓ alkogol’, geroin, narkotik kinderaş kebek isertkeç matdӓlӓr qullanu, alar belӓn sӓwdӓ itü, narkotik matdӓlӓr êşlӓp çığaru tıyılğan, bu qararnı ütӓmawçelӓrneñ cawaplılıqqa hӓm cӓzağa tartılaçağı belderelgän ide.

Tıyuğa qaramastan Äfganstanda mäk üsterü artqan.

Berläşkän Millätlär Oyışmasınıñ Narkotiklar häm cinayät’lär ofisı tarafınnan 2022 nçe yılnıñ noyabrendä dön’ya kürgän xisapta äytelgänçä, Taliban xakimiyätkä kilgännän soñ 2022 nçe yılda mäk üsterü annan êlekke yıl belän çağştırğanda 32%qa artqan.

Xisaptan kürengänçä, Äfganstan global’ äf’yun belän täêmin itüneñ 80%ın qanäğat’länderä.

Xäzerge iq’tisadi krizis häm qorılıq arqasında “az keremle” digän sıltaw belän ğadäti awıl xucalığı kul’turaların saylamağan qır xucaları az su taläp itkän mäk häm kindergä östenlek birä.