"Meksikağa barmağız!"

Amerika Quşma Ştatlarınıñ Texas töbägendä wäqalätlelär AQŞ watandaşlarına yazğı yallarda Meksikağa säyäxät itmäskä kiñäş birde. Alar qurqınıçsızlıq säbäple kisätü yasıy.

Texas cämäğat’ qurqınıçsızlığı departamentı beldergänçä, narkokartel’lär belän bäyle cinayät’lär Maksikağa baruçı härkem öçen ähämiyätle külämdä yanaw tudıra. Departament citäkçese Stiven MakKrow bu ildäge waqıyğalar häm kartel’lärneñ êşçänlegenä iğ’tibarnı cälep itä. “Keşelärne bu çorda Meksikağa barudan tıyılıp torırğa çaqırabız,”-di ul.

Bu kisätülärne uzğan atnada 4 amerikalınıñ urlanuınnan soñ yasıy başladılar. Älege keşelärneñ 2 se üterelde, 2se isän xäldä qotqarıldı.

Bazarda kiyemnär satu öçen Meksikağa kitkän 3 amerikalı xatın-qızdan da inde 2 atnadan artıq xäbär yuq.