Germaniyada êş taşlaw arqasında oçışlar ğamäldän çığarıldı
Germaniyada Berlin-Brandenburg, Hamburg, Hannover häm Bremen hawa mäydannarındağı êşläwçelärneñ kisätü zabastovkası arqasında yözlägän reys ğamäldän çığarıldı
Berlin-Brandenburg aêroportında êşläwçe iminlek personalı atna azağında häm yal könnärendä tülängän östämä aqçanıñ arttıruın taläp itep Verdi hönärçelär berlegeneñ çaqıruı belän ber könlek êş taşlaw çarasın ütkärde.
Kisätü akśiyası arqasında Berlin-Brandenburg hawa mäydanında yaqınça 270 oçış ğamäldän çığarılğan bulsa, monnan 27 meñ yulçı täêsirlände.
Êşläwçelär aêroport aldındağı Willy-Brandt mäydanında uram cıyının ütkärde.
Biredä çığış yasawçı Verdi hönärçelär berlegennän Enriko Rümker êş birüçelär kileşügä riza bulmağan oçraqta êş taşlaw çarasın kiñäytä aluları belän kisätte.
Hamburg, Hannover häm Bremen hawa mäydannarında isä däwlät şirkätlärendä êşläwçe cir häm iminlek personalı Verdi hönärçelär berlegeneñ çaqıruı belän bügen kisätü zabastovkasın ütkärde.
Hamburgta tuplam 173, Hannoverda 76 häm Bremendä 39 oçunıñ häm töşüneñ ğamäldän çığarıluı belderelde.
Däwlät şirkätlärendä êşläwçelär öçen 10,5% yäki kim digändä 500 yevro külämendä xezmät xaqın arttırunı taläp itüçe Verdi hönärçelär berlege 27nçe-29nçı mart könnärendä ütkäräçäk kümäk kileşü söyläşüläre aldınnan uzdırılğan şuşı kisätü üzençälegendäge êş taşlaw çarası belän êş birüçelärgä basımnı arttırunı maqsat itä.
