Suğıştan qaçqan ukrainnarnıñ kübese illärenä kire qayttı

Awrupa Berlege komissiyasınıñ êçke êşlärdän cawaplı äğ’zase Ylva Johansson 2022nçe yılnıñ 24nçe fevral’ könne başlanğan suğış arqasında Ukrainalı qaçaqlar öçen waqıtlı saqlaw kürsätmäse qabul itelüennän soñ uzğan ber yılğa bağışlap matbuğat oçraşuın oyıştırdı.

Suğıştan soñ Awrupa Berlegenä 16 million ukrainalınıñ kitüen belderüçe Johansson: "11 millionı Ukrainağa kire qayttı. 1 millionı Awrupa Berlegennän Amerika Quşma Ştatları, Kanada häm Angliya belän bergä başqa illärgä kitte. 4 millionğa yaqın ukrainalı Awrupa Berlege cirlärendä qaldı,” – dip äytte.

Ber jurnalistnıñ 11 million ukrainalınıñ suğış däwam itkän illärenä qaytularınıñ säbäbe turındağı sorawğa Johansson: "Kire qaytuçılar belän söyläştem. Biredä bäxetle bulmawların äytü öçen hiçber säbäp yuq. Biredä xuş itep qarşılanuların xis itä, läkin kübese, bälki dä, balaların biredä tuğannarınıñ yanında qaldırıp, suğışu, êşläw yäki Rusiyä agressiyasına qarşılıq kürsätüneñ öleşe bulu öçen kire qayttı,” – dip cawap birde.

Johansson atnalıq 200 meñgä yaqın ukrainalınıñ Awrupa Berlegenä kerep çığarğa däwam itüen iskärtep uzdı.

Awrupa Berlege komissiyasınnan yasalğan yazmaça belderüdä dä waqıtlıça saqlanu birelgän 4 million keşeneñ şuşı kürsätmä näticäsendä êşläw, belem alu, sälamätlek saqlaw häm toraq mömkinlegenä iyä buluına iğ’tibar yünältelde.

Belderüdä balalar öçen maxsus yaqlawnıñ täêmin itelüe häm xäzerge waqıtta Ukrainadağı balalarnıñ yaqınça biştä berseneñ Awrupa Berlegendä buluı mäğ’lümate citkerelde.

Belderüdä belem alu häm hönäri belem alu mömkinlege cähätennän dä 2022nçe yılnıñ sentyabr’ ayında uqu yılınıñ başlanuı belän yaqınça yartı million ukrain balasınıñ Awrupa Berlege külämendäge mäğarif sistemalarında terkälüe äytelde.

Yaqınça 2 meñ Ukrainalı xastanıñ 20 Awrupa Berlege ilenä êvakuaśiyälänelüe, tuğan cirlärennän küçerelgän yaqınça 1 million keşeneñ dä Awrupa Berlegendä êşläw mömkinlegen tabuı belderelde.