Niderlandta iñ kübe töreklärneñ dönäre aşala
Kapsalon dönäre digän rizıqnı biredä uylap çığaralar häm dön'yağa taratalar
Niderlandta 2022nçe yılda internet aşa iñ küp zakaz birelgän rizıq - töreklärneñ kapsalon dönäre bula. Ul qızdırğan bäräñge, äyländerep qızdırılğan it, çeddar sırı, salat häm soustan tora. Älege rizıqnı, bigräk tä, çit il keşeläre tügel, niderlandlılar üzläre yaratıp aşıy ikän.
Kapsalon - golland telennän çäçtaraşxanä dip tärcemä itelä. Anıñ kilep çığışı bolayraq bula: Türkiyäneñ Aqsaray cirlegennän Niderlandqa küçep kilgän häm monda aşxanä açqan Därwiş Bängü isemle törek keşese 2003nçe-20004nçe yıllarda kürşesendäge çäçtaraşxanädä êşläwçegä maxsus rizıq äzerli. Annarı ul gel şunı sorap ala torğan bula. Näticädä rizıqqa kapsalon - çäçtaraşxanä iseme birelä. Därwiş Bängü anı waqıt uzğan sayın beraz üzgärtä, yañarta.
Dönär äzerläwçe törek aşçıları Niderlandta bu rizıqnıñ kiñ taraluına säbäpçe bula. Şuña kürä kapsalon törek aş-suı bularaq tanıla başlıy.
Başta ul Rotterdamdağı restorannarda äzerlänä, soñınnan Niderland çiklären uzıp Bel’giyä, Amerika Quşma Ştatları häm Hindstanğa barıp citä.