İranda uquçılarnı ağulaw oçraqları nıqlap tikşerelä başladı

İranda 30nçı noyabr’dän birle 230 uqu yortında 5 meñnän artıq uquçınıñ ağulanuı belderelde.

İranlı uquçılar xäbär agentlığı İSNA citkergänçä, il parlamentınıñ ağulanu oçraqların tikşerü öçen maxsus tözelgän komissiyäse äğ’zası Möxämmät Xäsän Asfäri kiçä küzläw oyışması, êçke êşlär, sälamätlek saqlaw ministrlıqları, iminlek saqçıları wäkilläre qatnaşında cıyılış uzdırıluın äytte. Anda ağulanularnıñ säbäben açıqlaw öçen törle analizlar ütkärelüe, tik ağunıñ töre yäisä çığanağın bilgeli almawları, tikşerenüneñ däwam itüe turında citkerelde.

Asfäri söylägänçä, 100% tögäl bulmağan mäğ’lümatlarğa qarağanda, qayber urınnarda çeregän ciläk-cimeş isenä oxşaş gaz taraluı turında äytkännär. Ul sälamätlek saqlaw ministrlığınıñ waqıyğanı citdi räweştä küzätep baruın häm annan kiläçäk näticälärne kötülären belderde.  

İranda 2022nçe yılnıñ 30nçı noyabrennän birle, bigräk tä, qızlar belem aluçı uqu yortlarında kümäk ağulanu oçraqları küzätelä. Alarda sulış aluda qıyınlıqlar, küñel bolğanu, baş awırtu häm ayaq-qullarnıñ oyuı şikelle simptomnar bula.  

Rejim oppoziśyäse waqıyğanıñ artında İran xakimiyäte êçendäge Mäxsä Ämini demonstraśiyäläre öçen üç alırğa teläwçe qayber radikal’ törkemnär toruın alğa sörä.

Tähran idaräsenä yaqın çığanaqlar isä xalıqnı xakimiyätkä qarşı qotırtırğa teläwçe rejimğa qarşı êlementlarnı ğayepli.