Antarktikada diñgez bozı iñ tübän däräcädä

Antarktika qıytasın äyländerep alğan diñgez bozı 1979nçı yıldan birle iñ tübän däräcägä töşte.

Angliyäneñ BBC kanalı xäbärenä qarağanda, yaqınça 40 yıllıq mäğ’lümatlarnı tikşerü diñgez bozı öslegeneñ cillär, cılı hawa häm su şikelle säbäplär näticäsendä êrüen kürsätte. 13nçe fevral’dä ul 1,91 million kvadrat kilometrğa töşep iñ tübän däräcägä citte.  

Bıyılğı kürsätkeçlärneñ Antarktika yarımutrawınıñ könbatış häm könçığışında iyäläşelmägän yuğarı temperatura täêsire buluı uylanıla.

Ğalimnär isä Antarktika diñgez bozı däräcäsendäge bu üzgäreşne barı klimat taypılışlarına gına qaytarıp qaldırırğa kiräkmäwen belderä. Êrüneñ däwam itäçäge kötelä.

Antaktikada monnan aldağı iñ tübän boz däräcäse 2022nçe yılda terkälgän ide. Ul çaqta boznıñ öslege 1,92 million kvadrat kilometr bularaq ülçände.