Awrupa Berlege Türkiyäneñ qayğısın urtaqlaştı
Awrupa Berlege şurası başlığı Şarl’ Mişel’ Kahramanmaraş êpiśentrlı cirteträwlärdä häläq buluçılar öçen Türkiyäneñ qayğısın urtaqlaşuın belderde häm zilzilädän zıyan kürüçelärgä yärdäm öçen böten mömkinleklärne mobilizaśiyälärgä äzer buluların äytte
Mişel’ Bel’giya başqalası Bryussel'dä oyıştırılğan Awrupa Berlege liderlar sammitı axırındağı matbuğat oçraşuın Türkiyädä 6nçı fevral’dä barlıqqa kilgän cirteträwlär belän başladı.
Cirteträwlär arqasında Türkiyädä häm Süriyädä häläq buluçılar öçen qayğı belän urtaqlaşuçı Mişel’: "Awrupa Berlege häm äğ’za illär bularaq cirteträwdän zıyan kürüçelärgä häm êzläw-qotqaru êşçänlegenä yärdäm itü täwäkkällegebezne belderäm,” – dip äytte.
Mişel’, İlbaşı Räcäp Tayyip Ärdoğanğa Awrupa Berlege sammitı waqıtında böten Awrupa Berlege illäreneñ liderları qul quyğan xat cibärülären xäterlätep, cirteträwdän zıyan kürüçelärgä bulışlıq itü öçen böten mömkinleklärne mobilizaśiyälärgä äzer bulularına basım yasadı.
Mişel’ ayıruça Bryussel'dä ozaqlamıy cirteträwlärdän zıyan kürüçelärgä yärdäm öçen donorlar konferenśiyäsen oyıştıraçaqların bilgeläp uzdı.
Awrupa Berlege illäre liderları Bryussel’däge yuğarı däräcäle oçraşunı cirteträwlärdä häläq buluçılar öçen ber minutlıq tınlıq belän başlağan ide. Liderlar İlbaşı Ärdoğan isemenä imzalağan xatta da qayğı belän urtaqlaşqan, teläktäşlek citkergän ide.
