AQŞ ilbaşı Bayden Ğıyraq xökümäte räise Sudani belän söyläşte

Amerika Quşma Ştatları ilbaşı Djo Bayden häm Ğıyraq xökümäte räise Möxämmät Şiya äs-Sudani Ğıyraqnıñ iq’tisadi üseşe, regional’ häm global’ iminlek mäs’äläläre turında söyläşte.

Aq Yorttan yasalğan belderügä qarağanda, ike räsmi zat telefonnan söyläşte.

Bayden älege äñgämädä AQŞnıñ Ğıyraq belän imzalanğan Strategik qısalar kileşüenä tuğrı buluın rasladı, Sudaninıñ Ğıyraqnıñ suverenlıq häm bäysezlegen nığıtu tırışlıqların yaqlawın söyläde.

Belderüdä äytelgänçä, liderlar Ğıyraqnıñ iq’tisadı belän bäyle säyäsätlären qaradı häm AQŞnıñ bu säyäsätlärne xuplarğa äzer buluı citkerelde. Şulay uq, Baydennıñ Ğıyraq tışqı êşlär ministrı Fuad Xösäyenneñ kiläse atnada Vaşingtonğa säfären dä qanäğat’lek belän qarşılawı belderelde.

“İke lider DEAŞnıñ bütan berqayçan da Ğıyraq xalqı, regional’ häm xalıqara iminlekkä yanamawın täêmin itü burıçın üz öslärenä aldı” diyelä belderüdä. Citäkçelär kiläse aylarda da xezmättäşlek itü turında qarar qıldı.

Belderüdä äytelgänçä, Aq Yortta bulğan Yordaniya patşası Abdullax İkençe dä söyläşüdä qatnaşqan. Ul ileneñ Ğıyraqqa teläktäşlegen assızıqlap, urtaq asqorma proyektları xaqında süz äytkän.