Abbas Blinkenne qabul itte

Fälästin Däwlät başlığı Abbas Êntoni Blinken belän söyläşüennän soñ oyıştırğan matbuğat oçaşuında: "İke däwlätle çişeleşkä zıyan kiterelüe, imzalanğan kileşülärneñ bozıluı, okkupaśiya tuqtatılıp bistälärneñ beterelüe mäs’äläsendä xalıqara tırışlıqnıñ bulmawı, Fälästinneñ tanılmawı häm Berläşkän Millätlär Oyışmasında äğ’za bulmawınnan İzrail cawaplı,” – dip äytte.

Fälästin xalqınıñ legal’ xoquqlarınıñ xalıqara xoquq nigezendä yaqlanuı häm Fälästin xalqınıñ saqlanuı tırışularınıñ totqarlanuına iğ’tibarnı yünältüçe Abbas: "Bu säyäsät İzrailneñ tağın da kübräk cinayät êşläwen häm xalıqara xoquqnı bozuın täşviq itä,” – dip belderde.

Fälästin citäkçelegeneñ “köç qullanmaw” mäs’äläsendä tırışlıq kürsätüenä häm qul quyılğan kileşülärgä härwaqıt bäyle buluına basım yasawçı Mäxmüd Abbas: "İzrail okkupaśiyasın beterü häm 1967nçe yıldağı çiklärdä Fälästin däwläten tözü öçen säyäsi dialognıñ yañadan täêmin itelüe mäs’äläsendä bez AQŞ citäkçelege häm xalıqara cämäğätçelek belän bergä êşlärgä äzer,” - dide.

İzrailneñ uzğan atnada yaw astındağı Yordannıñ könbatış üzänlegeneñ tön’yağında urnaşqan Cänin qaçaqlar lagerına yasağan tentü kiyırenkelekne arttırdı.

Cänindä 10 fälästinle üterelgän baskınnan soñ Könçığış Qodüstäge qanunsız yähüd bistäsendä 7 izrailleneñ ğomere özelgän höcüm oyıştırılğan ide.

İzrail ğaskäre häm yähüd bistäçeläre (kilep urnaşuçıları) açqan ut näticäsendä 2023nçe yıl başınnan birle xatın-qızlar häm balalar belän bergä 35 fälästinle üterelde.