Öy biremnären yasalma zihennän êşlättergännär

Franśiyäneñ Lion şähärendä qayber studentlarnıñ biremnären yasalma zihen programması ChatGPTgä êşlätterüläre açıqlandı. İl matbuğatındağı xäbärlärgä qarağanda, Lion universitetı invalidlıq fännäre bülegendä uqıtuçı Stefan Bonvale uzğan yıl dekabr’ ayında 14 studentqa “Awrupada invalidlıqqa mediśina qaraşları” temasına mäqalä yazarğa quşa. Ul biremnärne tikşergändä süz sanı, sintaksis, grammatika häm añlatuda oxşaşlıq buluın kürep ala.

Bonvale monıñ töbenä töşärgä qarar birä häm studentlarnıñ yartısınıñ mäqalälären yasalma zihen programmasına yazdıruın açıqlıy. Tik älege programmanı qullanınu tıyu qağıydäse bulmaw säbäple uqıtuçı uquçılarınıñ êşen qabul itärgä mäcbür bula.  

Bonvale yasalma zihennän faydalanunıñ kiläse çorda belem birü tarmağı öçen borçu tudıruçı faktor ikänlegen belderde.