Rim papası 16nçı Benediktnı sonğı yulğa ozattılar

Vatikanda 31nçe dekabr’dä wafat bulğan 95 yäş’lek Maqtawlı Rim papası 16nçı Benediktnı sonğı yulğa ozattılar. Anı, San-Petro mäydanında uzğan cenaza çarasınnan soñ, İzge Pyetr bazilikası artındağı qaberlär arasına cirlädelär. Başqa märxüm Rim papaları da anda kümelgän.  

Papa Benediktnıñ dön’yawi iseme - Yozef Ratśinger, Germaniyä watandaşı. Ul 10 yıl êlek xastalana häm dini wazıyfasınnan kitä.

Cenaza yolasın xäzerge papa Franśisk başqara. Anda Germaniyä ilbaşı Frank Val’ter Ştaynmayer häm kanśler Olaf Şol’ś, İtaliyä ilbaşı Serdjio Mattarella häm xökümät räise Djordjiya Meloni, Portugaliyä ilbaşı Marselo Rebelu de Souza, Bel’giyä patşası Filipp, İspaniyäneñ êlekkege patşabikäse Sofiya, Kolumbiya tışqı êşlär ministrı Alvaro Leyva Duran häm başqa yuğarı däräcäle qunaqlar qatnaşa.  

Vatikanda 2005nçe yıldan 2013nçe yılğa qadär papa wazıyfasın başqarğan Yozef Ratśinger Katolik çirkäweneñ zamança tarixında üze älege urınnan kitkän berençe Papa bularaq tarixqa kerde.

16nçı Benediktnıñ, teologik tikşerenüläre arqasında, katolik dindarlar arasında ähämiyätle urını bula. Tik anıñ papa wazıyfasın başqarğan çorı Vatikan bankı İOPdağı skandallar, çirkäw êçendä censi qıyırsıtu oçraqları, “Vatileaks skandalı” bularaq bilgele rişwätçelektä ğayepläwlär häm gomoseksual yepiskoplarğa şantaj cäncalı şikelle waqıyğalar belän küñelsezlände.