Turistlarnı utırtqan avtobus tägäräde

Meksikanıñ Nayarit töbägendä turistlarnı utırtqan avtobus yuldan çitkä çığıp äylänä. Hälakättä 15 keşeneñ ğomere özelä. Alarnıñ 4se bala. 47 keşe yaralana. Alarnı xastaxanägä salalar. Xälläre turında mäğ’lümat citkerelmäde.

Nayarit prokuraturasınnan belderülärençä, 62 keşe berläşep älege avtobusnı arendalıy häm diñgezgä yul tota.

Cirle mediada urın alğan xäbärlärgä qarağanda, hälakät Nayarittağı kurort cirlege Guayabitostan qaytışlıy kilep çığa. Anıñ säbäplären tikşerü êşe bara.

İlneñ könbatış yarında urnaşqan Nayarit töbäge urmannarı häm plyajları belän turistlarnıñ yaratqan urını.

Meksikada xalıqnıñ yal itärgä baru öçen cıyılışıp avtobus arendalawı bilgele. Tik älege texnika yış qına qaralmağan, tözätelmägän bula. Näticädä arendalanğan avtobuslar qatnaşında daimi räweştä yul hälakätläre kilep çığa.