Qunaqxanädä qurqınıç yanğın
Kambodjanıñ turizm üzägendä çıqqan yanğında zarar kürüçelär küp
Kambodjada kazino êşlätüçe zinnätle qunaqxanädä çıqqan yanğında, berençel mäğ’lümatlarğa qarağanda, 10 keşeneñ ğomere özelde.
Waqıyğa Tailand çigenä yaqın Poypet şähärendä bula. Biredä çik buyı säwdäse häm turizm kiñ taralğan. Grand Daymond Siti qunaqxanäsendä yanğın tönge säğat’lärdä başlana. Oteldä êşläwçelär binadan çığa almıyça qala. Kimendä 10 keşeneñ ülüe, 30ınıñ cäräxätlänüe bilgele.
Sośial’ mediada taralğan videolarda binada çığa almıyça qaluçılarnıñ panikağa birelep täräzälärdän sikerergä mataşuı kürenä. Bik küp yaralını çikneñ ar’yağındağı Tailand şähäre Aranyapratxettäge xastaxanälärgä alıp kitälär.
Yanğınnıñ kilep çığu säbäbe älegä açıqlanmağan.
Tailand däwlät kanalı PBS citkergänçä, yaqınça 400 xezmätkär êşläwçe qunaqxanädä 50gä yaqın tailandlı barlığı farazlana.
