Dön'ya Talibannıñ qararına reakśiya belderä

Dön’ya Äfganstandağı ictimaği oyşmalarda xatın - qızlarnıñ êşläwen tıyğan qararğa reakśiya belderä.

Awrupa Berlege, Amerika Quşma Ştatları, Kanada, Avstraliya, Franśiya, Germaniya, Angliya, Niderland, Daniya, İtaliya, Norvegiya, Şveyśariya häm Yaponiya Talibannan xatın -qızlarnıñ Äfganstandağı ictimaği oyışmalarda êşläwen tıyu turındağı qararın ğamäldän çığaruın taläp ittelär.

Awrupa Berlegeneñ tışqı mönäsäbätlär häm qurqınıçsızlıq säyäsäte yuğarı wäkile belän 12 ilneñ tışqı êşlär ministrları Talibannıñ Äfganstandağı cirle yäki çit il ictimaği oyışmalarında xatın - qız personalnı êşlätüne tıyu qararı turında urtaq belderü yasadı.

Talibannıñ “uylanmağan häm qurqınıç” qararına borçılu citkerelgän belderüdä älege qarar belän yäşär öçen gumanitar yärdämgä moxtac millionlağan äfgannıñ tormışı qurqınıç astında buluı äytelä.

Belderüdä äytelgänçä, ägär dä Äfganstandağı xatın - qızlar gumanitar yärdäm taratuda qatnaşmasa ictimaği oyışmalarnıñ azıq-tölek, daru yärdämnären moxtaclarğa ireşterüläre mömkin tügel.

Urtaq belderüdä Talibannıñ bu qararınnan aşığıç räweştä waz kiçüe soraldı.

Qarar ictimaği oyışmalar belän êşläwçe xalıqara oyışmalarnıñ gumanitar yärdämnärenä dä yoğıntı yasayaçaq.

Taliban qızlarnıñ belem aluın tuqtatu qararınnan soñ  24 nçe dekabr’dä Äfganstanda êşçänlek başqaruçı ictimaği oyışmalarda xatın - qız personal êşlätüne kiläse belderügä qadär tuqtattı.

Xatın  - qız xezmätkären êştän çığarmağan ictimaği oyışmalarnıñ liśenziyäläre ğamäldän çığarılaçaq diyelde.

Annan soñ Save The Children, the Norwegian Refugee Council häm CARE kebek ildäge qayber xalıqara yärdäm oyışmaları êşçänleklären tuqtattılar.