Tunista saylawğa barı 11% tiräse keşe kilgän

Tunis bäysez yuğarı saylaw komissiyäse ildä 17nçe dekabr’dä uzğan irtä ğomumi saylawnıñ räsmi bulmağan näticälären belderde. Annan kürengänçä, tawış birüdä qatnaşu däräcäse 11,22% bulğan. Yäğ’ni 9 million 136 meñ 502 terkälgän saylawçınıñ barı 1 million 25 meñ 418e kilgän.

Saylawlarnıñ axırğı näticäläre 19nçı ğıynvarda açıqlanaçaq.

Bik küp säyäsi partiyä ilbaşı Kays Saidnıñ ğadättän tış qararlarına qarşı saylawğa boykot belderde. Qatnaşuçılarnıñ az buluı säbäple oppoziśiyä anıñ wazıyfasınnan kitüen teli.  

Naxda xäräkäte irtä ğomumi saylawlarnı xalıqnıñ ilbaşınnan ışanıç votumın aluı bularaq bäyäläde.

İlbaşı Kays Said 2021nçe yılnıñ 25nçe iyülendä parlamentnıñ êşçänlegen tuqtattı häm deputatlarnıñ qağılğısızlığın beterde. 22nçe sentyabr’dä isä qararlar belän wäqalätlären kiñäytep, başqarma xakimiyätne tulısınça üzenä bäyläde.

Qayber partiyälär häm säyäsi xäräkätlär Saidnıñ älege qararın “tüntäreleş” bularaq qabul itte.