Ärmänstanda xärbi küzläw başlığı qulğa alındı
Anı 2021nçe yılnıñ mayında Azärbaycan häm Ärmänstan ğaskäriläre arasında çıqqan bäreleştä wazıyfasın başqarmawda ğayeplilär
1921221
Ärmänstanda çik buyındağı wazıyfasına salqın qaraşta ğayeplängän Qorallı köçlärneñ küzläw citäkçese häm ğomumştab başlığı urınbasarı, general-mayor Araik Arutyunyan qulğa alındı.
Xäbär agentlığı Armenpress citkergänçä, anıñ qulğa alınuın Ärmänstan general’ prokuraturası wäqalätleläre rasladı.
General-mayor Arutyunyannı 2021nçe yılnıñ mayında Gegarkunik rayonındağı Kut häm Verin Şorja awılları tiräsendä Azärbaycan häm Ärmänstan ğaskäriläre arasında çıqqan bäreleştä wazıyfasın başqarmawda ğayeplilär. Anda ul korpus komandirı bula. Älege waqıyğadan soñ berniçä ay ütügä xärbine Qorallı köçlärneñ küzläw citäkçese häm ğomumştab başlığı urınbasarı itep bilgelilär.
13nçe dekabr’dä Arutyunyanğa ğayepläwlär belderelä, 14endä qulğa alu qararı çığarıla.
