İran belän Rusiya ğaläm xezmättäşlege turında kileşkän

İran belän Rusiya ğaläm industriyäse ölkäsendä xezmättäşlekne üsterü maqsatınnan kileşü berketmäsenä qul quyğan.

İrannıñ räsmi agentlığı “IRNA” xäbär itkänçä, kileşü tekstına İrannıñ Kiş utrawında uzğan Xalıqara aviaśiya yärminkäse waqıtında İran kosmik agentlığı belän Rusiya Federal’ ğaläm agentlığı (Roskosmos) wäqalätleläre imza salğan.

Qul quyu tantanasında çığış yasağan İran kosmik agentlığı başlığı Xäsän Salariya älege kileşü berketmäseneñ ike il arasında ğaläm ölkäsendäge êlemtäne nığıtaçağın beldergän.

 “Bu xezmättäşlek dokumentı sizemläw häm telekommunikaśiya iyärçennären tözüdä xezmättäşlek itü, laboratiriya asqormasın buldıru häm cıyu, oçırtu bazası häm iyärçen testı kebek mäs’älälärne üz êçenä ala”,- dip beldergän Salariya.

”Roskosmos” başlığı Yuriy Borisov Mäskäw - Tähran arasında kosmik industriya xezmättäşlegeneñ 2002 nçe yılda başlanğanın iskärtep uzğan.

Ul İrannıñ bu ölkädä zur uñışlarğa ireşüen belderep:” İrannıñ kosmik industriyäne üsterü programması bu tarmaqnıñ barlıq yünäleşlären üz êçenä ala häm Rusiya İranğa maqsatlarına ireşergä bulışa”,- digän.

Yuriy Borisov İran kosmonavtın Rusiya ğaläm stanśiyäsenä cibärüneñ ike ilneñ urtaq programmalarınıñ berse buluına basım yasağan.