Fetnäçelär 272 keşeneñ canın qıydı

Kongo demokratik cömhüriyäteneñ könçığışındağı Tön’yaq Kivu töbägendä fetnäçelärneñ 2nçe dekabr’ tönendä yasağan höcümendä 272 grajdanlınıñ ğomere özelüe belderlde. Bu xaqta sänäğat’ ministrı häm Tön’yaq Kivu töbägeneñ êlekkege gubernatorı Jul’yen Paluku belderde. Ul “23nçe mart xäräkäte” dip yörtelüçe ğıys’yançı törkemneñ höcümen küpläp üterü dide. Canı qıyılğan 272 keşeneñ 17se bala.

Paluku äytkänçä, Kongo demokratik cömhüriyäteneñ yustiśiyä ministrı älege waqıyğanı tikşerüne sorap Xalıqara cinayät’ mäxkämäsenä möräcäğat’ itü öçen Gaagağa kitkän.

İlneñ könçığışında “23nçe mart xäräkäte” äğ’zaları belän iminlek köçläre arasında 2021nçe yılnıñ martınnan birle köçle bäreleşlär bara.

Kongo demokratik cömhüriyäte “23nçe mart xäräkäte”n Ruandanıñ yaqlawın alğa sörä. Alarnıñ Tön’yaq Kivu töbäge başqalası Gomanı qulğa töşerüennän qurqalar.  

Ruanda älege belderülärne kire qağa. İke däwlät arasında säyäsi häm diplomatik kiyerenkelek däwam itä.

BMO xisaplarına qarağanda, Kongo demokratik cömhüriyäte çiklärendä çığarıluçı qayber qıymmätle qazılmalarnı ğıys’yançılar kürşe illärgä urlıy.