Xäzär diñgezendä meñnärçä üle tyulen'

Rusiyäneñ Dağıstan cömhüriyätendä Xäzär dingeze yar buyında 2 meñ 500 tiräse üle tyulen’ tabıldı.

Dağıstan tabiğıy çığanaqlar häm êkologiyä ministrlığı citkergänçä, başta 600läp üle xaywan kürenä, annarı alarnıñ sanı kübäyä başlıy.    

“Qızğanıçqa, sannarı ähämiyätle külämdä arttı häm xäzer 2 meñ 500 tiräse buldı” diyelä belderüdä.

Üle tyulen’närneñ diñgez yarında törle urınnarda tabıluına iğ’tibarnı cälep itälär. Bigräk tä, Yuzbaş töbägendä häm Sulak belän Şurnika yılğalarınıñ tamaqlarında küp.  

Xaywannardan patologik ürnäklär alınğan, alarnı laboratoriyädä tikşergännän soñ tyulen’närneñ ülem säbäbe açıqlanır dip kötelä.

Xäzär diñgezendä soñğı 10 yılda täwge tapqır bu çaqlı zur külämdä tyulen’ üleme küzätelüe assızıqlandı.