"İran berqayçan da atom-töş qoralına iyä bulırğa tiyeş tügel"

Angliyä tışqı êşlär ministrı Djeyms Kleverli İrannıñ berqayçan da atom-töş qoralına iyä bulmasqa tiyeşlegen äytte. Ul Twitterdağı yazmasında älege ilneñ atom-töş programmasın tağın da kiñäytüen, monıñ rejim tarafınnan dön’yaküläm iminlekkä yanawnıñ tağın ber dälile buluın belderde.

“Êçtä üz xalqın cäberläwçe rejim, hiçşiksez, dus häm berlektäşlärebezgä dä yanayaçaq. İran berqayçan da atom-töş qoralına iyä bulırğa tiyeş tügel,”-dide ministr.

Xalıqara atom ênergiyäse agentlığı belän citärlek külämdä xezmättäşlek itmäwe säbäple oyışmanıñ idarä şurasında İranğa qarşı qarar çığarıldı. Tähran idaräse isä moña reakśiyä bularaq Fordodağı atom-töş ob’yektında urannı 60% çistalıqta bayıta başladı.

Angliyä, Franśiyä häm Germaniyä öçlege kiçä İrannıñ atom-töş programmasın tağın da kiñäytü qararın tänqıyt’läde. Alarnıñ urtaq belderüendä “İrannıñ bu adımı global’ atom-töş qorallarınıñ kiñ cäyelüen kisätü sistemasına qarşı kilä” digän yullar bar.