İranda hawa pıçraqlığınnan ülälär

İranda hawanıñ pıçraqlığı 1 yılda yaqınça 21 meñ keşeneñ ülemenä säbäpçe buldı. Bu xaqta ilneñ sälamätlek saqlaw ministrlığınıñ hawa çistalığı häm klimat üzgärü idaräse räise Abbas Şaxsuni söyläde.

Uzğan yıl İranda 27 şähärdä tikşerenü ütkärelä. Anda açıqlanğança, hawanıñ pıçranuına bäyle awırulardan 20 meñ 800 keşeneñ ğomere özelgän. Bu kürsätkeç başqala Tähranda 6 meñ 400.

Ber yıl êlek isä şul uq säbäplär arqasında ülüçelär sanı il külämendä 41 meñ 700, başqalada 3 meñ 751 bularaq belderelgän ide.

Tähranda hawa pıçranu şähärdä hawa śirkulyaśiyäse bulmawğa, keşe küplegenä, êlekkege model’ texnika belän kiñ qullanılıştağı motośikllardan çıqqan gazğa bäyle.